ភ្នំពេញក្រោន បន្តឈរកំពូលតារាងលីក ៤ សប្ដាហ៍ជាប់គ្នា
ក្រូច ម៉ុល(លេខ៥) របស់វេស្ទើន ប្រជែងតែតបាល់នឹង ធុល សុធារិុទ្ធ របស់ត្រាយអាស៊ី។ រូបថត ម៉េងស្រ៊ុន
ភ្នំពេញៈ ក្រុមភ្នំពេញក្រោន បានគេចផុតពីការព្រួយបារម្ភទាំងឡាយ ដើម្បីរក្សាការឈរនៅលើកំពូលតារាងនៃក្របខ័ណ្ឌមិត្តហ្វូន ខេមបូឌានលីក ឆ្នាំ២០១៤ ជាបន្តទៀត បន្ទាប់ពីក្រុមមួយនេះ នៅតែអាចជម្នះរាល់ការលំបាក ដើម្បីរកបាន៣ពិន្ទុបន្ថែម ដូចក្រុមដែលកំពុងមានបំណងប្រជែងយកទីតាំងរបស់ខ្លួននោះ។
ថ្វីបើមិនទាន់បានបូកបញ្ចូលពីលទ្ធផលនៃការប្រកួតរបស់ចំការកៅស៊ូបឹងកេត និងក្រុមក្រសួងការពារជាតិ ដែលបានលេងនៅលើទីលានពហុកីឡដ្ឋានជាតិ កាលពីរាត្រីថ្ងៃអាទិត្យ ម្សិលមិញ ប៉ុន្តែការរកបាន៣ពិន្ទុបន្ថែមរបស់ក្រុមភ្នំពេញក្រោន និងក្រុមកំពុងឈរនៅលេខរៀងទី២ណាហ្គាខប ក្នុងការប្រកួតសប្តាហ៍ទី៨ កាលពីថ្ងៃសៅរ៍ វានៅតែបញ្ជាក់បានថា បឹងកេត នៅតែឈរនៅលេខរៀងទី៣ដដែល បើទោះបីជាក្រុមនេះ ឈ្នះឬចាញ់ការពារជាតិ ក៏ដោយ។
ឆ្លងកាត់ការប្រកួតយ៉ាងស្វិតស្វាញ នៅលើទីលានពហុកីឡដ្ឋាន កាលពីរាត្រីថ្ងៃសៅរ៍នោះ ភ្នំពេញក្រោន បានជួបការលំបាកយ៉ាងច្រើន ក្នុងការប្រឈមជាមួយក្រុមអគ្គស្នងការនគរបាលជាតិ(ប៉ូលិស) ព្រោះចង្វាក់លេងរបស់ក្រុមទាំង២នេះគឺមានឱកាសដាក់សម្ពាធលើ គ្នាទៅវិញទៅមក។
ជាមួយលទ្ធផលស្មើ ០-០ ជាបណ្តោះអាសន្ន សម្រាប់ការប្រកួតនៅក្នុងតង់ទី១ វាកាន់តែធ្វើឲ្យការប្រកួតប្រជែងរបស់ប៉ូលិស និងភ្នំពេញក្រោន មានភាពតានតឹងមួយកម្រិតទៀត ប៉ុន្តែភាពសប្បាយរីករាយ បានកើតមានឡើងចំពោះភ្នំពេញក្រោន នៅពេលខ្សែប្រយុទ្ធនីហ្សេរីយ៉ា Bisan George បានរកឃើញគ្រាប់បាល់ជ័យជម្នះឲ្យភ្នំពេញក្រោន សម្រាប់ការប្រកួតនៅក្នុងតង់ទី២នោះ ហើយលទ្ធផលនេះបានជួយឲ្យភ្នំពេញក្រោននៅតែអាចរក្សាទីតាំងកំពូលតារាងរបស់ខ្លួនជាបន្តទៀត។
ផ្ទុយ ទៅវិញ ក្រុមគិរីវង់សុខសែនជ័យ ដែលលេងនៅទីលាននោះដែរ នៅតែមិនអាចរកឃើញជ័យជម្នះលើកដំបូងរបស់ខ្លួនបានដដែល នៅពេលពួកគេបានចាញ់ក្រោមដៃបៀលប្រាយ ក្នុងលទ្ធផល ១-០ នោះ ហើយខ្សែប្រយុទ្ធ ចាន់ ឆាយ៉ា ជាអ្នករកគ្រាប់បាល់ជ័យជម្នះឲ្យបៀលប្រាយ នៅក្នុងការប្រកួតនេះ ដើម្បីធ្វើឲ្យ៨ប្រកួតរបស់បៀលប្រាយ មានលទ្ធផលឈ្នះ៣ ស្មើ២ និងចាញ់៣ប្រកួត និងមាន១១ពិន្ទុនៅក្នុងដៃ។ ប៉ុន្តែ៨ប្រកួតរបស់គិរីវង់ គឺបានត្រឹមស្មើ៤ និងចាញ់៤ប្រកួត ហើយក្រុមនេះកំពុងឈរនៅលេខរៀងទី១១ បន្ទាប់ពីក្រុមបាតតារាង។
ចំណែក ក្រុមណាហ្គាខប បានបន្ថែមកំណត់ត្រាចាញ់ទៅឲ្យក្រុមម្ចាស់ជើងឯកឆ្នាំចាស់ ស្វាយរៀង មួយប្រកួតទៀតហើយ សម្រាប់ការជួបគ្នានៅទីលានស្តាតចាស់ កាលពីថ្ងៃសៅរ៍នោះដែរ ហើយជ័យជម្នះរបស់ណាហ្គាខប គឺរកបានដោយកីឡាករជប៉ុន Jang In Yong នៅក្នុងតង់ទី២ ដែលលទ្ធផលនេះបានជួយឲ្យណាហ្គាខប នៅរក្សាការឈរនៅលេខរៀងទី២ ជាបន្តទៀត ដោយមាន១៩ពិន្ទុស្មើភ្នំពេញក្រោន តែមានគ្រាប់បាល់ចំណេញ តិចជាងចំនួន២គ្រាប់ដដែល។
ចំពោះក្រុម អាស៊ីអឺរ៉ុប ដែលលេងនៅទីលាននោះដែរ បានរំកិលឡើងទៅឈរនៅលេខរៀងទី៨វិញហើយ បន្ទាប់ពីក្រុមមួយនេះបានយកឈ្នះក្រុមបាតតារាង Albirex Niigata ក្នុងលទ្ធផល ៣-១ នោះ។ ខ្សែប្រយុទ្ធ George Kelechi រកបាន២គ្រាប់តែម្នាក់ឯង ហើយខ្សែប្រយុទ្ធ ថន តារាពេជ្រ បានបន្ថែម១គ្រាប់ទៀត ដើម្បីជួយឲ្យអាស៊ីអឺរ៉ុប ស្គាល់រសជាតិឈ្នះជាលើកទី២ ក្នុងការប្រកួតទាំង៨លើក រីឯ១គ្រាប់របស់ Albirex រកបានដោយកីឡាករជប៉ុន Tatsuta Kazuki។
ត្រាយអាស៊ី តាមត្រឹមស្មើនឹងវេស្ទើន
ដោយឡែកការប្រកួត នៅពហុកីឡដ្ឋានជាតិ កាលពីល្ងាចថ្ងៃអាទិត្យ ម្សិលមិញនេះ ក្រុមគ្រប់គ្រងដោយជប៉ុន ត្រាយអាស៊ី ដែលមានសន្ទុះខ្លាំង សម្រាប់ការប្រកួតនៅដើមរដូវកាលនោះ បានជួបនូវការបារម្ភភ្លាមមួយរំពេច នៅពេលខ្សែប្រយុទ្ធ M.Privat បានទាត់ទម្លុះទីរបស់ខ្លួន ដើម្បីជួយឲ្យវេស្ទើន ធ្វើការនាំមុខបណ្តោះអាសន្ន ១-០ នៅក្នុងតង់ទី១នោះ។
តែទោះបី ជាយ៉ាងណា ការព្យាយាមវាយបកជាបន្តបន្ទាប់របស់ត្រាយអាស៊ី សម្រាប់ការប្រកួតនៅក្នុងតង់ទី២ បានផ្តល់ឱកាសឲ្យខ្សែប្រយុទ្ធលំដាប់អាជីពរបស់ជប៉ុន Kihara Masakazu ធ្វើការវាយបកបាន១គ្រាប់វិញ ដើម្បីបញ្ចប់ការប្រកួតលើកទី៨នេះជាមួយលទ្ធផលស្មើគ្នា ១-១ ហើយការបានត្រឹម១ពិន្ទុនេះបានជួយឲ្យត្រាយអាស៊ី ឡើងទៅឈរនៅលេខរៀងទី៥វិញ ខណៈក្រុមវេស្ទើន ឈរនៅលេខរៀងទី១០ ដូចសប្តាហ៍ទី៧ ដដែល៕
ប្រភពពី www.postkhmer.com
Post a Comment